Staksteinar 30.des

Hermdarverkamenn hafa framið enn eitt hryðjuverkið gegn leiðtogum í Líbanon.

 

Nú var það Chata, fyrrverandi fjármálaráðherra og sendiherra landsins í Bandaríkjunum, sem var sprengdur í loft upp í bifreið sinni.

 

Hinn myrti var stjórnmálalega nátengdur Hariri, fyrrverandi forsætisráðherra Líbanons, sem hlaut sömu örlög.

 

Sérkennilegt er að lesa fréttaskýringu fulltrúa BBC á staðnum, sem telur að tveir aðilar komi helst til álita þegar tilræðismannanna er leitað.

 

Annars vegar hljóti Ísrael (!) að koma til álita eða þá Hezbolla-hreyfingin og aðrir útsendarar ráðamanna í Sýrlandi og Íran.

 

Furðar fréttaskýrandi BBC sig á því að enn hafi talsmenn á svæðinu ekki bent á Ísrael sem líklegasta ábyrgðaraðila ódæðisins.

 

Hvernig skyldi standa á þessu sameiginlega einkenni sem er á fréttum þessarar fréttaveitu og ríkisfréttastofunnar hjá okkur?

 

Sú síðarnefnda ræður alls ekki við sig, þegar gerð er grein fyrir fréttum frá þessu svæði, vegna andúðar ef ekki beinlínis haturs á Ísraelsríki.

 

Allir vita hvernig fréttaveita „RÚV“ ber sig að í pólitískum dilkadrætti heima fyrir, en af hverju einnig í erlendum fréttum?