Álver í Helguvík

http://www.vb.is/skodun/100004/

Það er kominn tími til að hætta þvaðrinu og horfast í augu við að mjög langsótt er að álver rísi í Helguvík í náinni framtíð. Ekki nema það verði tekin pólitísk ákvörðun í stjórn Landsvirkjunar, sem myndi þá ekki byggja á kröfu um ásættanlega arðsemi, að ráðast í virkjanir til að útvega ódýra orku. En það tæki líka einhvern tíma að hrinda því í framkvæmd. Það er heldur ekki í samræmi við yfirlýsingar forstjóra Landsvirkjunar, Harðar Arnarsonar, sem hefur hamrað á því að orkuverð til álfyrirtækja þurfi að hækka.

Landsvirkjun þurfi að dreifa áhættunni og í samræmi við það hefur verið til skoðunar að kanna hagkvæmni þess að leggja sæstreng til Bretlands. Það var kominn tími til að reka Landsvirkjun meira á markaðslegum forsendum sem allir skattgreiðendur munu njóta góðs af í framtíðinni.

Þetta má meðal annars álykta ef orð Michaels A. Bless, forstjóra Century Aluminum, eru sett í samhengi. Bless heldur að hann geti talað með ákveðnum hætti við erlenda greiningaraðila og snúið sér svo að íslenskum fjölmiðlum og talað með allt öðrum hætti. Svo þegar það er rekið ofan í hann, það sem hann sagði á erlendum vettvangi, reynir hann að telja almenningi á Íslandi trú um að þetta sé allt risastór misskilningur. Aðferðum spunameistara er beitt með því að vísa í þessu samhengi í smáatriði, sem haft var rangt eftir, til að kasta rýrð á endursögn af fundi hans í heild.

Næstum allar forsendur sem Bless lagði til grundvallar því að byggja álver í Helguvík eru ekki til staðar. Það eru ekki að nást samningar milli Century, Orkuveitu Reykjavíkur og HS Orku. Þetta staðfestir Bless sjálfur og forstjórar orkufyrirtækjanna. Auðvitað er auðvelt að halda því fram að Century muni byggja álver í Helguvík ef fyrirtækinu býðst ódýr orka og aðrir taki áhættu af fjárfestingunni. Bless segist vera í viðræðum við Landsvirkjun sem á samt ekki að óbreyttu alla þá orku sem þarf í verkefnið. Sérstaklega ekki á þeim kjörum sem Century er tilbúið að borga miðað við núverandi markaðs- aðstæður. Það skín nefnilega í gegn að stjórnendur Century eru ekki áfjáðir í að byggja þetta álver og það skal engan undra því forsendur nú eru allt aðrar en þær voru þegar samningar voru undirritaðir árið 2007.

Síðan þá hefur álverð lækkað úr 2.800 dollurum í rúmlega 1.700 dollara. Samhliða hefur gengi á hlutabréfum í Century lækkað úr því að vera 52,5 í hlutafjárútboði 2007 í kringum 9. Það ætti að gefa til kynna hvernig fjárfestar meta framtíðarmöguleika fyrirtækisins og hvernig það mat hefur breyst á þessum árum. Á sama tíma hefur verð hlutabréfa í S&P 500 vísitölunni hækkað um 20%. Þetta segir heil- mikla sögu og skal engan undra hvernig Bless talar í útlöndum.

Það verður líka að fylgja sögunni að fjórir stjórnendur Century hafa haft persónulega hagsmuni af því að halda verkefninu gangandi. Þeir fengu greitt andvirði fjögurra milljóna Bandaríkjadala (tæpan hálfan milljarð króna) fyrir að halda Helguvík á lífi til ársins 2012. Þannig að þrátt fyrir að forsendurnar fyrir því að fara í verkefnið séu mjög veikar hafa stjórnendur hag af því að halda málinu í pattstöðu. Og orkufyrirtækin geta ekki slitið viðræðum af ótta við skaðabótamál.

Norðurál er rósin í hnappagati Century-samsteypunnar. Stjórnendur þar hafa náð góðum árangri í sínum rekstri undanfarin ár svo eftir er tekið. En það er kominn tími til að Bless segi bless við Helguvík."

 

 

 

Er þetta gerast á hægri stjórnar vaktinni?

Var það ekki vinstri stjórninni að kenna að Helguvík var ekki farið í gang og nú á allt að fara í fljúgandi start?

 

kv

Slegg