snjohengjan.is...... hvells

Hvaða skoðun hafa flokkarnir?

Mun þinn flokkur leitast við að semja við erlenda kröfuhafa sem leiðir til bestu niðurstöðu fyrir íslenskt samfélag?

Mun þinn flokkur setja það í forgang að semja um Snjóhengjuna á komandi kjörtímabili?

Að sjálfsögðu viljum við vinna að bestu lausn fyrir íslenskt samfélag á þessum vanda. Kröfuhafar eru hins vegar fjölbreyttari hópur en oft er látið í veðri vaka. Sumir er óþolinmóðir. Þeir kunna að vilja gefa afslátt af kröfum sínum. Það er mikilvægt að láta reyna á það. Aðalatriðið er að missa ekki sjónar af meginverkefninu, sem er að auka traust á hagkerfinu. Viðskipti okkar við erlenda kröfuhafa mega ekki verða til þess að minnka traust.

Björt framtíð mun setja það í fullkomin forgang að auka traust Íslendinga og útlendinga á íslenska hagkerfinu. Snjóhengjan endurspeglar vantraust. Fáir vilja eiga krónu. Of fáir sjá ástæðu til að fjárfesta á Íslandi. Þess vegna vill fólk skipta krónunum í aðra gjaldmiðla. Það er full ástæða til að ætla að fleiri en erlendir krónueigendur vilji gera það, líka íslenskir. Sjóhengjan sé því yfirgripsmeiri. Hér þarf plan: Aukin fjárfestingatækifæri s.s. í skapandi greinum, grænum iðnaði, tækni- og hugverkaiðnaði og ferðaþjónustu og hins vegar þarf að liggja fyrir skýr áætlun um að taka upp annan gjaldmiðil, sem skapar forsendur fyrir stöðugleika í hagkerfinu. Það eykur traust. Við teljum að það eigi að klára ESB-viðræðurnar og fara inn í ERM II, og taka síðan upp evru. Án plans í þessum efnum verður hagkerfið látlaust í lausu lofti með snjóhengju yfir sér.

Guðmundur Steingrímsson

Björt framtíð

Lesa nánar

Það segir sig sjálft að reynt verður að semja við erlenda kröfuhafa og um snjóhengjuna eins fljótt og hægt er, því gjaldeyrishöftin standa á meðan þessi mál hanga yfir þjóðinni. Hitt er annað mál að gæta verður þjóðarhagsmuna mjög vel og aðilar sem keyptu sig ódýrt inn í umhverfi gjaldeyrishafta og gjaldþrota geta ekki ætlast til annars en verulegar eftirgjafar. Seðlabankinn er á sama máli. Ef samningar nást ekki má alltaf leysa málið með þýsku leiðinni, nýrri íslenskri mynt sem innleysir eignir og kröfur á mismunandi gengi.

 

Gísli Tryggvason

Dögun

Lesa nánar

Að sjálfsögðu. Framsókn stóð allan tímann fast á hagsmunum Íslands í Icesave deilunni og í samningum við erlenda kröfuhafa er á sama hátt nauðsynlegt að ganga fram af fullri hörku til að verja hagsmuni þjóðarinnar. Erlendu kröfuhöfunum var ljóst frá upphafi að þeir voru að kaupa sig inn í stöðu sem þeir þyrftu að semja sig út úr. Í slíkum viðræðum er það grundvallarhlutverk íslenskra stjórnvalda að taka fast á kröfuhöfunum og setja hagsmuni íslands, heimila og atvinnulífs framar öllu öðru. Sérstaklega er vert að muna að fullveldisréttur ríkisins gerir samningsstöðu Íslands gríðarsterka og þann styrk mun Framsókn nota til fulls ef á þarf að halda. Eina ásættanlega niðurstaðan úr samningum við erlenda kröfuhafa er sú sem leiðir til bestu niðurstöðu fyrir íslenskt samfélag.

Já. Lausn á snjóhengjuvandanum og losun fjármagnshaftanna er forgangsverkefni til að hægt sé að skapa aðstæður fyrir stöðugleika og eðlilegt viðskiptalíf, uppbyggingu atvinnulífs og atvinnusköpun. Gríðarlega mikilvægt er að þetta verkefni sé unnið með hagsmuni Íslands í algeru fyrirrúmi og að áhersla verði lögð á heildarlausn á öllum þáttum snjóhengjuvandans. Þar á meðal þarf að taka fast á erlendu kröfuhöfunum og tryggja að hagsmunir íslenskra heimila, sem hafa borið tjónið af hruni fjármálastofnananna, verði hafðir í forgangi. Íslenska ríkið hefur lagasetningavaldið og skattlagningavaldið til að leiða til lykta samninga við erlenda kröfuhafa og taka á snjóhengjunni og stjórnvöldum ber að nýta það vald til fulls svo að besta hugsanlega niðurstaða fáist fyrir Ísland. Fyrsta verkefni stjórnvalda er ætíð að standa vörð um hagsmuni þjóðarinnar. Það verður umfram allt að vera grunnmarkmiðið sem lausn snjóhengjunnar byggir á.

Sigmundur Davíð Gunnlaugsson

Framsóknarflokkurinn

Lesa nánar

Eigendum aflandskróna og erlendum kröfuhöfum þrotabúanna yrði boðið tvær leiðir að losna úr viðjum gjaldeyrishaftanna; a) að skipta yfir í nýjan íslenskan gjaldmiðil "ríkisdal"með 95% afföllum, eða b) skipti á aflandskrónugengi í 30 ára skuldabréf, gefnu út í bandaríkjadal með 1,5% vöxtum.

Já, innan 12 mánaða.

Guðmundur Franklín Jónsson

Hægri grænir

Lesa nánar

Lýðræðisvaktin vill koma bönkunum í hendur verðugra eigenda í stað vogunarsjóða. Við viljum vita, hvaðan þeir koma peningarnir, sem nýir eigendur bankanna reiða fram. Fyrir liggur, að 93% þjóðarinnar vantreysta bönkunum. Við það er ekki hægt að búa öllu lengur.

Þjóðin þarf sem fyrst að losna undan snjóhengjunni, svo að hægt sé að afnema gjaldeyrishöftin. Þetta þarf að gerast í samhengi við endurskipulagningu bankakerfisins.

Þorvaldur Gylfason

Lýðræðisvaktin

Lesa nánar

Við munum að sjálfsögðu leitast við að nýta sem best í þágu þjóðarinnar þá samningsstöðu gagnvart erlendum kröfuhöfum sem við sköpuðum sjálf með því að fella erlendar eignir þrotabúa bankanna undir höftin með lagabreytingu í mars í fyrra. Sjálfstæðismenn greiddu atkvæði gegn þeirri breytingu og Framsókn sat hjá. Þessa stöðu þarf að nýta með sanngjörnum hætti í þágu samfélagsins í heild. Mikilvægt er að hún verði nýtt til að losa okkur út úr höftum og greiða niður skuldir ríkisins ef þess verður nokkur kostur, til að lækka óbærilegan vaxtareikning þjóðarinnar. Ef við höldum áfram skuldasöfnun, losnum við aldrei úr höftum.

Já. Markmið allra aðgerða hagstjórnar á næstu misserum verður að vera að ná árangri við úrlausn snjóhengjuvandans og losa gjaldeyrishöft. Agi í ríkisfjármálum er forsenda afnáms hafta. Áframhald aðildarviðræðna við ESB mun styðja við þetta ferli og auðvelda úrlausnina.

Árni Páll Árnason

Samfylkingin

Lesa nánar

Stutta svarið er já. Lengra svarið er að það er ljóst að það þarf verulegar afskriftir af þessum kröfum og ýtrustu hagsmuna íslensku þjóðarinnar verður gætt við lausn málsins. Í sjálfu sér eru kröfuhafarnir ekki í neinni stöðu til að semja við Íslendinga, nær væri að segja að þeir þyrftu að fella sig við skilyrði sem þeim verða sett.

Þetta hangir saman við lausn gjaldeyrishaftanna, sem er algjört forgangsatriði. Það þarf að finna lausn á þessum málum, samningum við kröfuhafana og snjóhengjunni. Snjóhengjan sem þröskuldur við afléttingu gjaldeyrishaftanna verður því að fara.

Bjarni Benediktsson

Sjálfstæðisflokkurinn

Lesa nánar

Vinstri græn leggja áherslu á að uppgjör þrotabúa gömlu bankanna ógni ekki fjármála- og gengisstöðugleika. Ein leið til þess að það takist væri að ná samningum um uppgjör þeirra en það er ekki eina leiðin. Útgönguskattur kæmi einnig til greina ef ekki væri útlit fyrir viðunandi niðurstöðu í samningum. Aðalatriðið er að uppgjörið sé sett í samhengi við aðra þætti í afnámsferli gjaldeyrishafta eins og gömlu snjóhengjuna. Einnig þarf að tryggja að ekki verði fall á gengi krónunnar en það myndi ógna stöðugleika hagkerfisins og hafa mikil áhrif á heimili og fyrirtæki vegna þeirra verðbólgu sem slíkt hefði í för með sér.

Vinna við afnám gjaldeyrishafta er forgangsmál og stjórnvöld eiga að fá utanaðkomandi aðila til að tryggja að farið verið í það ferli með heildrænum hætti. Við leysum þetta mál ekki með því að taka á afmörkuðum vanda innan haftanna heldur með því að ná utan um umfang hans í heild. Snjóhengjan er einn þáttur en vinnu við hana þarf að skoða í samhengi við uppgjör þrotabús bankanna enda á þjóðarbúið takmarkaðan gjaldeyri til að greiða til aðila sem vilja út með sínar krónur. Þetta er því ekki einungis skuldavandi heldur gjaldeyrisvandi líka. Einnig er mikilvægt að sú þverpólitíska nefnd sem hefur unnið að afnámsferlinu haldi áfram til að tryggja samstöðu um ferlið.

Katrín Jakobsdóttir

Vinstri græn

Lesa nánar

Forsvarsmenn allra stærstu stjórnmálaflokka landsins voru spurðir um afstöðu þeirra til Snjóhengjunnar í umfjöllun vefmiðilsins Eyjunnar. 

Athugasemdir

[Björn Sig. (IP-tala skráð) 23.4.2013 kl. 22:36]

Það eru mjög sterk rök fyrir því að verðtryggingin sé kolólögleg, þannig að ef svo er, veður lítið eftir inn í bönkunum,þannig að engir samningar koma til greina fyrr en niðurstað fæst um verðtrygginguna.

Síðan á eftir að fara í mál vegna ólölegra gengisbundinna lána,sem eru búin að valda heimilum og fyrirtækjum gífurlegum skaða og hörmungum, og gætu þær skaðabætur verið upp á mörghundruð miljarða,síðan gæti verðtryggingin bæst við.