Grín? Nei, þó ekki

http://eyjan.pressan.is/frettir/2013/01/08/er-thetta-myntin-sem-bjargar-bandariskum-efnahag-ur-snorunni/

Ráðamenn í Bandaríkjunum ræða nú af fullri alvöru að slá sérstaka billjón dollara platínumynt til að koma í veg fyrir mögulegt greiðslufall innan nokkurra vikna. Repúblíkanar í fulltrúadeildinni hafa þegar gripið til mótvægisaðgerða.

Málið snýst í grunninn um að koma í veg fyrir að skuldaþakið svokallað verði rofið. Hugmyndinni hefur verið misjafnlega tekið, en meðal þeirra sem mælt hafa með henni er Nóbelsverðlaunahafinn Paul Krugman. Aðrir segja hugmyndina galna og líkjast frekar söguþræði úr Simpsons þáttunum en hagfræði. Engu að síður er hugmyndin raunhæf og ekki jafn brjáluð og afleiðingar þess ef ekki næst samkomulag um skuldaþakið, segja margir.

Um er að ræða platínumynt, eitt stykki, upp á eina billjón dollara sem fjármálaráðuneytið gæfi út og geymd yrði í Selabankanum. Með henni væri komist framhjá skuldaþakinu svokallaða, sem er sú hámarksupphæð sem bandaríska ríkið má fá að láni.

Ef skuldaþakinu er náð og fulltrúadeild þingsins ákveður að hækka það ekki, getur ríkissjóður ekki tekið frekari lán. Þar með gæti ríkið ekki staðið við skuldbindingar sínar sem að líkindum myndi þýða greiðslufall. Skuldaþakinu hefur reyndar þegar verið náð og hefur fjármálaráðuneytið gripið til sértækra aðgerða til að standa við skuldbindingar sínar. Þær duga hins vegar ekki nema um tvo mánuði til viðbótar. Greiðslufall ríkissjóðs hefði geigvænlegar afleiðingar fyrir bandarískt efnahagslíf, sem um leið hefði afar neikvæð áhrif á hagkerfi flestra landa í heiminum.

Repúblíkanar, sem stjórna fulltrúadeild þingsins, hafa notað skuldaþakið sem vopn í baráttu sinni við öldungadeildina og forsetann, einkum í því skyni að ná fram auknum niðurskurði ríkisútgjalda.

Þess vegna er rætt um að billjón dollara myntina sem leið til að komast hjá því að fulltrúadeildin haldi skuldaþakinu í gíslingu. Þegar myntin er slegin þýðir það einfaldlega að ríkissjóður eignast billjón dollara sem hægt er að nota til að greiða reikninga. Galdurinn liggur í því að efnahagsleg áhrif verða engin, ólíkt því sem gerðist ef fjármálaráðuneytið myndi ákveða að prenta samsvarandi upphæð, þar sem verðbólga myndi rjúka upp úr öllu valdi. Peningamagn í umerð verður nefnilega hið sama og áður.

Samkvæmt lögum má ríkið ekki prenta peninga til að þurrka út skuldir sínar, en glufa í lögunum gerir ríkissjóði kleift að fara þessa óvenjulegu leið. Fjármálaráðuneytið hefur nefnilega leyfi til að slá platínumyntir við sérstök tilefni, sem fyrst og fremst hafa safngildi. Það sem meira er, fjármálaráðherra Bandaríkjanna getur ákveðið upp á sitt sjálfdæmi hversu mikils virði myntin skuli vera. Hann ræður einnig lögun myntarinnar, þannig að hún gæti þess vegna verið á stærð við hross, verið eins og Flórídaríki í laginu og skartað andlitinu á John Boehner, leiðtoga Repúblíkana, jafnvel með áletruninni „MEGADEATH“. Eina skilyrðið er að myntin sé úr platínu.

Repúblíkanar óttast mjög að fjármálaráðherrann Timothy Geithner láti verða af þessu og hafa þegar lagt fram frumvarp þess efnis að ríkissjóði verði bannað að slá verðmæta mynt til að lækka skuldir.

 

Hélt fyrst að um brandara væri að ræða. En við nánari lestur þá er fúlasta alvara í gangi. 

kv

sleggjan

 

Athugasemdir

[Jóhann Kristinsson, 9.1.2013 kl. 09:52]

Timothy Geithner er eins og kallað er í BNA "a HAS BEEN," svo ekki verður það hann sem verður arkítekt á þessari nýju mynt.

En billjón dollara mynt dugir nú lítið upp í skuldina, það væri kanski nær að hafa þetta trilljón dollara mynt.

Það er ekki langt í það að BNA verður eins og Grikkland; þegar lokað verður á lán til BNA þá hrynur þetta allt saman, því ekki geta kanarnir verið án þessa góðu Obama dollara eins og lýðurinn er farinn að nefna eyðslu dollarana hjá Obama.

Kveðja frá Saudi Arabíu

[Sleggjan og Hvellurinn, 9.1.2013 kl. 10:47]

USA þarf að draga úr útgjöldum.

Þeir eru með 50þúsund hermenn í Þýskalandi. Tugþúsundir hermenn í Kóreu. Afganistan, Írak.....

 sem dæmi

hvells